【名家給力場】聯儲局明年掉頭加息？

【Now財經台】美國聯儲局一如預期按兵不動，美息喺今年餘下時間會點走，現時市場幾乎一面倒預期會繼續維持利率不變，市場都消化咗呢個預期，就算年內會再減息，都會喺今年較後時間。此外，有40%人士預期，聯儲局可能喺明年4月底加息，點睇美息走向？

臻享顧問董事總經理王良享表示，如果睇最新利率期貨，由約23%機會減息，變成約15%機會加息0.25厘，佢認為，今年餘下時間減息機會好微，美伊戰事推升油價，霍爾木兹海峽(Strait of Hormuz)仍未重開，相信油價會持續高企一段時間，油價飆升已推高整體通脹，但暫時未影響到核心通脹，不過，如果情況再維持多1至2個月，到時就可能會影響埋核心通脹，Tommy估計，美伊第2階段談判可能要拉鋸1至2個月，相信美國通脹有機會喺6月、7月見頂。

美國就業市場方面，Tommy估計，今年美國移民人數會由去年50萬人，大減至今年逾20萬人，由於勞動力下降，失業率上升機會唔大。

佢又話，對聯儲局嚟講，喺高通脹及失業率未穿頂之下，唔大可能減息，即使油價短期跌至每桶90美元，好多需求仍被消滅，美國明年經濟增長將會放緩，加上人口老化及移民人數減少，人均國內生產總值(GDP)就冇咁高，喺呢個情況下，就唔會有太大加息壓力。