【FINTERVIEW】拆解聯儲局議息聲明(上)

【Now財經台】美國聯儲局一如預期維持利率不變，議息聲明指出，美國就業平均維持喺低位，全球能源價格上升令通脹維持高企，中東局勢發展加劇經濟高度不確定性，相比上次嘅議息聲明，今次直指能源價格導致通脹升溫，地緣政治方面更採用更強烈嘅字眼，整體看法略為轉差。

安柏環球投資總監雷志海指，睇返美國經濟活動及數據，其實數字相當正面，製造業、服務業等持續擴張，零售消費方面，美國人仍好樂意消費，不過，人工智能(AI)發展或對就業市場帶嚟挑戰，尤其係初階職位會減少，但整體嚟講未見出現好大變數，佢認為，美國整體經濟唔係太差。

John又話，對聯儲局嚟講，仍有唔少不明朗因素，最大變數係能源價格，例如油價走向等。此外，聯儲局下任主席沃什(Kevin Warsh)多次強調，要維持聯儲局獨立性，其後又話聯儲局需進行改革，雖然冇講邊方面要進行改革，但仍留低唔少變數，不過，現任主席鮑威爾(Jerome Powell)卸任主席後，會繼續留喺聯儲局，相信會起到穩定作用。