【期匯決算】供應仍緊張油價跌唔落

【Now財經台】美國總統特朗普(Donald Trump)宣布延長停火期，並繼續封鎖霍爾木茲海峽(Strait of Hormuz)，消息一度刺激倫敦布蘭特期油重上每桶100美元，紐約期油就曾經重上90美元，其後雙雙回落，油價後市會點行？

外匯策略專家張建泰表示，商品市場氣氛的確緩和咗，因為市場一開始以為一旦美伊傾唔掂數，美軍會再度攻擊伊朗，甚至將軍事行動升級，雖然現在延長停火期，但霍爾木茲海峽繼續封鎖，不單其他國家嘅油輪過唔到，伊朗嘅石油亦冇辦法輸出，因為完全冇船可以通過，雙方仍處於對峙局面，因此，喺原油供應仍然緊張下，估計油價會持續高企。

Ken又相信，布油有機會再重上100美元，近期唔同國家及機構都有行動，包括透過釋放戰略石油儲備控制油價，佢認為，120美元係一個重要關口，一旦升穿，原油供應就會進入一個非常緊張嘅局面，屆時甚至會衝擊經濟。