【環球金融快線】Apple換CEO是好是壞？

【Now財經台】領導蘋果公司(Apple Inc.)15年嘅庫克(Tim Cook)退下火線，今年9月起，集團硬件工程高級副總裁特努斯(John Ternus)就會接任Apple CEO，集團依家最大問題係人工智能(AI)發展落後、產品冇重大突破等，特努斯上任後，係咪可以扭轉呢個局面？

易方資本投資組合經理王逸研指，換人未必係壞事，Apple嘅交接一直都比較穩陣，庫克唔係忽然退任，而係培訓定幾個潛在接班人去做一啲重要嘅營運、人事決策，喺呢個「影子模式」下熟習管治模式，有充足經驗。

Issac又話，Apple硬件過去幾年較為領先，而軟件AI就較慢，雖然CEO換咗人，但估計大方向不變，不過，AI模型業務未來或有變，可能引入OpenAI、Gemini，反而可以從呢啲模型公司中賺錢。

股價方面，Issac認為市場有少少低估咗Apple，佢認為可以睇返樂觀少少，雲AI會慢慢變成發展重心，由「養龍蝦」開始，相信Apple會係未來關鍵選擇之一。