【名家給力場】沃什用CV證明夠班做Fed話事人

【Now財經台】美國聯儲局(Fed)下任主席候選人沃什(Kevin Warsh)，將會喺本港時間今晚(21日)10點出席國會聽證會，據流出嘅5頁發言稿，開首大部分都係陳述其學歷及職業生涯，又提到聯儲局必須為通脹負全責、確保物價穩定，而家美國核心消費物價指數(CPI)按年升2.6%，核心個人消費支出物價指數(PCE)按年升3%，美伊戰事又令通脹前景不確定性，可以點做？會唔會預示沃什會透過重啟縮表，甚至擴大縮表規模遏通脹，創造減息空間？

資深經濟分師羅家聰指，由於沃什唔係從聯儲局內部晉升，而係由美國總統特朗普(Donald Trump)提名嘅「空降」人選，必然會面對議員嘅質疑及阻撓，甚至令認受性降低，所以佢詳細陳述學歷、政府公職及市場經驗，目的係證明他具備Fed主席所需嘅資歷及經驗。

KC補充，遏通脹係聯儲局首要任務已經係市場共識，但現時冇太大空間及板斧遏通脹，唯一可以做就係唔減息，甚至加息，依家問題係通脹唔算太高，但又喺現水平維持咗幾年，由於依家要維持一個比較緊嘅息口水平，所以進一步減息空間未必太大。