【環球金融快線】毋須驚AI泡沫避開科企債

【Now財經台】阿波羅資產管理(Apollo)日前警告，美國31萬億美元嘅國債中，對沖基金持倉比例已升至8%，較5年前大升5個百分點，由於對沖基金傾向利用回購協議(Repo)等高槓桿工具賺取微利，一旦資金成本上升或債市波動，或引發大規模國債平倉。與此同時，據Vanguard統計顯示，科技債喺投資級別債佔比約10%，但近期受甲骨文(Oracle)等巨頭資本開支疑慮影響，信用利差大幅擴闊，點評估呢啲潛在風險？

獨立市場策略師陳俊文指，其實都唔需要太擔心，因為美債呢段時間相對平穩，雖然對沖基金持債比例上升，槓桿亦高，但整體投資仍較小，如果真係導致債市出現波動，10年期國債孳息率有機會由以前0.1嘅標準差，變成0.2至0.25標準差，但演變成系統性風險機會較微，相信僅對銀行等對債券波動敏感嘅機構影響較大，一般投資者唔會睇到太大差距。

科技債方面，Norman就話，雖然Oracle資金開支壓力增加，但3大評級機構仍維持集團投資級別，息差擴闊意味債價變得更平，加上科技債比例僅約10%，未必要因為人工智能(AI)泡沫或資本開支憂慮刻意避開科企債券。