【槓桿致勝】港股市底唔差造淡要小心

【Now財經台】恒生指數今朝(21日)高開約80點後，升幅一度擴大至逾百點，其後走勢轉弱，好淡倉資金方面，好倉資金昨日(20日)食糊，所以轉為流出逾7500萬元，5日合計有約1.4億元離場，淡倉連續兩日有資金流入，5日合計仍有逾1.57億元坐貨。此外，牛證重貨區於25800點，熊證重貨區就喺26500點，亦係最多人加倉嘅位置。美伊局勢又出現變數，係咪入場造淡嘅好時機？

胤源世創家族辦公室(香港)第一副總裁黃偉豪指，市場觀望美伊談判有冇進展，恒指窄幅上落，暫時都冇乜方向，以近期消息面嚟睇，雖然美伊仍未重返談判桌，但美股、港股投資者都唔係睇得咁負面，市底其實唔係咁差，所以造淡就要小心，暫時可先睇26000點，如果破咗呢個整數關口，先再睇25500點，牛證方面，如果大市再向上，收回價可以擺26800點或27000點水平，可避開即市收回風險。