【名家給力場】曦智科技有星級基投撐抽得過

【Now財經台】今日(20日)有兩隻新股開始招股，其中，光電混合算力供應商曦智科技(01879)食正光通訊熱潮，成為市場焦點，集團宣稱係全球第1家實現光電混合算力大規模部署嘅企業，點睇公司前景？

《香港股票財技密碼》作者梁杰文表示，曦智同其他18C特專科技公司比較，唔係一隻純概念股，因為公司部分光電混合產品已開始商業化，去年收入約1億人仔，市場亦預期未來幾年行業將會出現爆發式增長。

佢又話，曦智創辦人係麻省理工學院(MIT)物理博士，2017年已提出過透過光性能超越傳統電子晶片嘅願景，之後返回內地創立曦智，集團產品已開始商業化，並進行IPO，值得投下信心一票，因為人工智能(AI)發展將帶動上游晶片爆發式增長。

投資價值方面，Mike指出，曦智大部分基石投資者都係一線投資者，陣容無可挑剔，有強大嘅基投力撐，上市初期表現應該唔錯，有一定值博率。