【期匯決算】Yen好大機會向160水平爆邊

【Now財經台】通脹預期再度升溫，環球債市受壓，日本10年期債息升至1997年以來高位，雖然首相高市早苗上周表示，將會喺5月再釋放石油儲備，不過經濟產業大臣赤澤亮正最新指出，日本需為通脹持續做準備，日本央行月底議息時，立場會唔會明顯轉鷹？日圓近期喺158至160水平橫行，後市爆邊機會有幾大？

ATFX亞太區首席分析師林銘添指，美伊衝突持續影響全球生產及能源供應，日本作為高度依賴能源進口嘅國家，戰事延長引發嘅通脹壓力，一定會打擊日本經濟，所以市場睇返都轉向悲觀，即使日央行轉鷹，都未必可以說服投資者加息後，日圓將會轉強或收益增加。

Martin又話，若中東戰事持續，加上市場對日本財赤嘅憂慮，日圓好大機會向160水平爆邊，現時日圓呈拾級而上格局，若正式突破160關口，下一站可以睇162水平。佢續指，近期日圓偏弱，所以就算日本央行加息刺激日圓向上，呢個升勢都未必可以持續，預期日圓短期會喺160至162上落。