【息賺】Chok市短線博反彈唔用Covered Call？

【Now財經台】美伊談判傾唔掂數，令中東局勢更不明朗，喺市況波動下，如果投資Covered Call要注意乜嘢？美國都有唔少Covered Call產品，收益仲高過香港嘅Covered Call，點解有呢個情況？

獨立市場策略師何啟聰指，今年比較主流嘅Covered Call，表現都差過佢哋追蹤嘅指數，例如Global X國指備兌(03416)及Global X恒指備兌(03419)，策略通常係每個月做1次，如果嗰個月股市大升，由於啱啱沽咗個Covered Call，就會限制咗升幅，所以累計幾個月之後，表現就會差過指數，出現「升就跟唔足、跌就跟到足」嘅尷尬情況。Ivan補充，Covered Call喺長期有機會提供穩定收益，但短期嚟講，若擔心美國總統特朗普(Donald Trump)會TACO，或市場會出現波動，就未必適合用佢嚟博大市反彈。

Ivan又話，美國嘅Covered Call交易所買賣基金(ETF)上市歷史較長，做咗唔少調節機制，例如JEPQ、GPIQ，美國產品未必會將所有持倉都做Covered Call，基金經理會根據後市預期調整比例，亦有機會唔係沽等價嘅Covered Call，而係做價外5%至10%嘅產品，當股市上升，相關資產升值會跟得比較貼個指數，相比之下，現時喺香港上市嘅產品大多係沽等價，導致限制咗上升空間。