【名家給力場】博尼賣走蝕錢業務輕裝上陣

【Now財經台】服裝股博尼控股(01906)上周五(10日)宣布將貼身衣物品牌業務、物業及由物業擔保的銀行及借款，以2.41億人仔賣畀主席金國軍嘅兒子，估計獲利1800萬人仔，亦意味博尼將撤出品牌零售，專注貼牌生產(ODM)業務，股價今早(13日)輕微高開後，一度逆市升3.6%，高見0.57元，係咪反映市場都Buy呢單Deal？

《香港股票財技密碼》作者梁杰文指，對股東嚟講都算係好消息，雖然品牌業務佔比唔大，但一直係集團主要虧損來源，依家起碼可以「止血」，更可以透過出售資產獲利。

Mike又話，今次大股東唔止收購香港博尼品牌業務，更接手個廠房及孭埋逾2億人仔嘅銀行貸款，交易完成後，集團資產負債表將有明顯改善，雖然冇咗個大廠房，但負債比率及負債總額都少咗，公司未來就可以將資源重點放喺ODM業務，雖然ODM毛利冇品牌業務咁高，但勝在收入穩定，而受外圍經濟波動嘅影響亦較細，事實上，公司近年喺呢瓣業務都賺到錢，可以留意集中火力經營呢部分業務後，可唔可以吸引到更多生意。