【期匯決算】美元暫難扭轉弱勢

【Now財經台】美伊達成停火2周協議，十國集團(G10)貨幣今個星期全線升，當中以挪威克朗最強勢，累升近3%，紐元、澳元緊隨其後，連較弱嘅日圓都升0.3%，導致美匯指數跌至99以下。雖然市場對美伊談判傾向樂觀，但戰局仍有唔少變數，美匯指數下周有冇機會反彈？

獨立外匯商品分析師盧楚仁表示，除咗戰事發展，相信市場焦點都落喺美國今晚(10日)出爐嘅3月消費物價指數(CPI)，如果CPI大升，理論上會利好美元，但如果公布時油價急挫，反而不利美元，現時大部分金融市場及產品嘅走勢都同油價息息相關，而油價走向又要視乎局勢發展，所以都要睇埋美伊談判係咪順利，若談判有實質成果，相信下周一(13日)油價勢大跌，相反，若談判破裂，油價或會衝高，但要小心衝高回落風險。

Jasper估計，美元向下嘅機會仍較大，屆時會利好非美貨幣，若美匯指數失守98.5水平，相信美元強勢將暫告一段落。