【全民打新】3新股撞期招股散戶唔使「大包圍」

【Now財經台】3隻新股本周撞期招股，其中，最有「星味」係「杭州六小龍」頭炮群核科技(00068)，另外兩隻新股係分布式儲能系統(DESS)解決方案供應商思格新能(06656)，同埋內地CMOS圖像傳感器(CIS)供應商長光辰芯(03277)，3隻新股都同科技有關。

此外，集資額最高及入場費最貴係思格新能，一手逾3.2萬元，反而「明星新股」群核集資額最少，入場費亦最平，一手只係約3800元。若資金有限，喺新股愈來愈難抽之下，應該點揀？

BLUE WATER CAPITAL投資總監李澤銘表示，思格新能、群核嘅概念比較吸引，因為近排市場都係炒緊呢啲概念，勝在熱度夠，又同軟件、人工智能(AI)沾到邊，估計會較受歡迎。

Alan又指，長光辰芯同製造業相關度較高，如果炒概念、想像空間就未必太多。佢認為，思格新能、群核會較受歡迎，尤其喺地綠政局較波動嘅市況下，投資者更願意炒純概念股，原因係唔會太受政治因素影響。