【期匯決算】金價4800美元至5000美元可造淡

【Now財經台】金價由之前每盎司約4800美元，落到現時4600美元水平，其實2月底3月初戰事開打時，金價已經急挫，美國總統特朗普(Donald Trump)最新話，未來2至3周將會向伊朗發動猛烈攻擊，係咪意味金價又要捱沽？

獨立外匯商品分析師譚家康指，睇返金價技術走勢，已經係一浪低於一浪，主要受地緣政局不確定性影響，但依家已確認伊朗唔夠打，近乎一面倒捱打，所以地緣政治因素已愈來愈少。

佢又指，睇返黃金期貨倉位變化，對比1年前，基金嘅黃金好倉少咗逾30%，對比今年1月都少咗約20%，反映喺呢輪升浪中，基金及投資者已獲利離場，冇咗呢批基金好倉，就算金價未來有得升，都未必升得多，佢認為，4800美元至5000美元係造淡嘅理想水平。