【環球金融快線】記憶體股博反彈揀SK海力士

【Now財經台】2月底中東戰事爆發初期，儲存記憶體晶片相關股被視為抗跌力最強之選，不過，近日SK海力士(SK Hynix)、三星電子(Samsung Electronics)、西部數據(Western Digital)及SanDisk股價大幅回調，現時4隻股份嘅估值仍算吸引，市盈率(PE)唔算高，SK海力士、三星市帳率(PB)分別為4.7倍及2.3倍，甚至可以話平，加上券商最新畀嘅目標價都算高，市場係咪可以趁機執定平貨？

獨立市場策略師何啟聰指，儲存記憶體晶片股大跌後，走勢有機會同大市同步，呢類公司建廠資本消耗好大，但周期性相當高，睇返過去10年，若晶片需求突然大減，呢啲公司一至兩年內可以蝕好多錢，依家市場預期大周期完結後，呢啲公司可能要面對產能過剩問題，業績可能「見紅」，所以部分公司PE只得4倍至5倍，變相估值就唔應該直接用PE角度去睇，反而應該用平均PE去計。

Ivan又話，SK海力士、三星PE相對平，意味反彈空間亦較多，尤其係SK海力士，估值及市佔率都較低，如果未來可以發行美國預託證券(ADR)，待市場穩定後，相信SK海力士嘅反彈力度會相對較大。