【名家給力場】樓市套戥壓力或改變需求

【Now財經台】近期息口及樓價前景陷入拉鋸，加上中東局勢不穩，愈來愈多買家持觀望態度，據瑞銀引述數據指，近期大型新盤去貨速度及認購反應，已經冇之前咁熾熱，以黃竹坑港島南岸Deep Water South為例，近期銷售率跌至約65%，而早前預期會出現嘅樓市「小陽春」亦冇影，到底邊個因素對樓市影響最大？

資深經濟分析師羅家聰指，「小陽春」係包括新年季節性因素，而樓市旺唔旺亦要睇埋周期及基本因素，其實依家息口、通脹、經濟增長等周期因素，同樓價嘅關係都唔係太密切，甚至見到恒生指數同樓價出現過背馳嘅情況，反映單一因素好難解釋到樓市走向，依家影響本港樓市除咗本地因素，仲有戰事、關稅及外圍樓價周期等，其中，內地樓價持續疲弱，或會同化香港樓市周期。

基本面方面，KC就話，雖然近年地產商放慢推盤步伐令供應減少，但需求亦有增長，例如多咗大學帶動個別地區需求，同時亦要留意另一個利淡因素，就係內地同香港樓價仍有差距，以新界同深圳為例，一旦樓價差距超過2%，套戥壓力或會改變需求，所以喺咁多因素影響下，好難判斷邊個因素主導本港樓市走向。