【環球金融快線】美軍工股長揸冇得輸？

【Now財經台】美以伊戰事持續，不過，洛歇馬丁(Lockheed Martin)、雷神(RTX Corporation)、克魯曼(Northrop Grumman)、波音(Boeing)4大軍工股嘅股價，喺伊朗領袖被斬首後首個交易日已經見咗頂，其後輾轉回落，波音下滑幅度更逾20%，點解呢場仗拖長咗，軍工股反而冇運行？

iFast Global Markets副總裁溫鋼城表示，喺戰爭醖釀期間，軍工股反而係最好炒，但戰事去到今日對軍工行業未見好大幫助，因為戰機等裝備損毀唔算多，所以雷神、波音做唔到大Deal，亦幫唔到業績。不過，長期蝕錢嘅波音，因為有美國總統特朗普(Donald Trump)幫公司搵生意，包括中東國家已買咗一批飛機，令波音扭虧為盈之餘，亦將市盈率(PE)推高至100倍以上。

佢又指，如果想投資軍工股，洛歇馬丁、雷神、克魯曼勝在穩陣，估值方面，雷神以造飛機為主，技術含量較大，所以估值會相對貴。整體而言，由於美國好睇重軍工經濟，加上長期處於備戰及戰爭狀態，需要用上大量軍備，加上軍工行業係大選嘅主要金主之一，有一定話語權，所以軍工股長線有一定投資價值。