【環球金融快線】私貸市場有爆煲危機？

【Now財經台】據摩根士丹利估算，私人信貸市場嘅規模去年已增至3萬億美元，惹嚟市場關注。隨著人工智能(AI)技術顛覆各行各業，過往吸金力強嘅企業軟件公司或面臨收入減少嘅風險，借錢畀呢類企業嘅私人信貸基金，會唔會有爆煲風險？甚至拖累整個金融體系？

獨立市場策略師陳俊文指，私人信貸公司過去一直傾向借錢畀企業軟件公司，主要係認為呢類公司嘅商業模式好，競爭相對細，客戶流失率又低。不過，隨著AI技術迅速普及，呢個優勢受到挑戰，喺企業軟件公司受AI衝擊下，私人信貸公司的確會有唔少損失。

不過，Norman強調，私人信貸公司並非銀行，投資者即使投資基金，虧損就虧損，呢種損失通常只會停留喺基金層面，唔會演變成系統性風險。佢又分析，私人信貸基金好少會運用到槓桿，因為私人信貸資產嘅流動性較低，私人銀行基於風險管理，會拒絕借錢比呢類基金。因此，即使私人信貸基金因為買錯軟件板塊而輸錢，都只係純粹帳面損失，只會影響到該基金公司同其投資者，唔會波及市場嘅穩定性。