【環球金融快線】馬斯克為太空放棄Tesla？

【Now財經台】由全球首富馬斯克(Elon Musk)創辦嘅SpaceX，估值將達1.25萬億美元，較去年12月嘅估值再增2200億美元，綜合美國傳媒推算，SpaceX旗下火箭發射及星鏈(Starlink)業務收入強勁增長，去年高達160億美元，並已實現正現金流，SpaceX交出好成績，擔唔擔心馬斯克「分心」，因而忽略咗Tesla？

獨立分析師何啟聰指，馬斯克嘅重心已轉到機械人，部分Tesla車款停產，騰出生產線畀機械人，因為馬斯克認為繼續做電動車都未必會有好大增長。佢又指，Tesla已轉攻平價市場，即使車款唔係最好，但可以維持到市佔率。

Ivan相信，Tesla嘅命運將取決於Robotaxi、機械人嘅發展，加上馬斯克熱衷開展新計劃，暫時太空計劃係佢嘅主要目標。