【全民打新】大族數控上市初期水位唔多？

【Now財經台】PCB專用生產設備解決方案服務商大族數控(03200)昨日(29日)開始招股，下周二(2月3日)截飛，預期下周五(2月6日)首日掛牌，入場費約9676元，籌最多逾48億元，招股價上限95.8元，較A股上市價159元人仔有好大折讓，估計上市初期會有幾多水位？值唔值博？

高歌證券金融首席分析師聶振邦指，大族數控AH股有約45%折讓，會有一定吸引力，集團今次發售約5000萬股，基石投資者佔一半，通常國際投資者有25%或以上，都算係反應唔錯，但街貨有2500萬股，可能會限制咗上市初期嘅升幅。

聶Sir又指，大族數控嘅基石投資者有一定叫座力，包括國際大型投資公司及基金公司，例如新加坡政府投資公司GIC、施羅德旗下公司等都有參與，為中長線投資帶嚟保證。