【中國建設銀行(亞洲) 呈獻:FINTERVIEW】內地通縮壓力紓緩？(上)

【Now財經台】內地通脹數據今朝(9日)出爐，2025年12月內地居民消費價格指數(CPI)按年升0.8%，符預期，工業生產者出廠價格指數(PPI)按年跌1.9%，較去年11月收窄0.3個百分點，內地係咪已暫時擺脫通縮危機？不過，委內瑞拉局勢或影響平價石油供應，呢個變數點影響內地通脹？

資深經濟學家彭藹嬈表示，雖然內地CPI按年升幅符合預期，但升勢主要受「其他用品及服務」類別帶動。佢解釋，近期國際金銀價格顯著上升，直接推動相關消費品價格，令CPI數據按年由負轉正，不過，若撇除呢個因素，其他主要消費類別數據都微跌，反映內地整體內需仍然疲弱。

PPI方面，通縮壓力有所緩和，Iris指出，有色金屬板塊表現強勁，當中以銅價走勢最突出，受惠於人工智能(AI)熱潮，相關科技硬件同設備對銅需求增長，帶動銅價上升，為PPI帶嚟支持。

油價方面，佢認為，雖然委內瑞拉局勢變天，但內地企業採購石油嘅渠道唔止1個，亦有好多中小型油企可以選擇其他供應來源，相信影響相對可控。