【中國建設銀行(亞洲) 呈獻:息賺】揀儲蓄分紅險產品要留意4樣嘢

【Now財經台】市場憧憬美國聯儲局明年會繼續減息，收息產品方面，儲蓄分紅險會係唔錯嘅選擇，投資者揀呢類產品時有咩要留意？

資深財商顧問薛健鋒指，儲蓄分紅險由「保證部分」及「非保證紅利部分」組成，當中「保證部分」佔比較細，大概相等於保費，而「非保證紅利部分」係整份保單入邊，資產回報最大、最重要嘅部分，結構分為復歸紅利及終期紅利，分紅實現率有機會出現變動。

Lawrence續指，以前市場上有較多保證成分較高嘅產品，但因為回報較低，內部報酬率(IRR)只有3至4厘，呢類產品逐漸被市場淘汰，依家市場上熱賣產品都係分紅部分較多嘅儲蓄單，值得留意係，比起保單上保證回報數字，投資者更需要留意保險公司資產管理能力，以及過去兌現紅利部分能力，亦要留意分紅實現率及總現金價值比率。