【期匯決算】阿拉比卡咖啡豆價難再升？

【Now財經台】巴西嘅阿拉比卡(Arabica)咖啡豆供應持續減少，按年跌近20%，阿拉比卡咖啡豆價格連升3日，雖然美國已放寬對巴西咖啡關稅，但都刺激唔到出口，阿拉比卡咖啡豆價格未來會點走？

獨立外匯商品分析師盧楚仁指，暫時仍然喺高位爭持，由於近期不斷受好淡消息影響，令阿拉比卡咖啡豆價格持續大上大落，不過，若美元持續偏弱，巴西供應又持續減少，價格就有機會向上。

不過，佢認為暫時都唔可以完全睇好，始終全球經濟疲弱，對咖啡豆嘅需求未必太大，加上阿拉比卡咖啡豆現價唔算高，估計暫時喺385美元水平有阻力。