【環球金融快線】摩通股價明年繼續跑輸？

【Now財經台】摩根大通股價日前受集團開支增加消息拖累，單日挫近5%，但綜合大行最新評級，大部分仍建議「買入」或「持有」，而目標價較周二(9日)大跌前有近10%至近20%水位，依家係咪可以趁低吸納？

資深經濟師羅家聰表示，摩通喺美國嘅業務範圍廣泛，而估值係用業績模型計算，喺聯儲局減息下，孳息曲線有利銀行息差，導致模型會將盈利預測及估值推高。佢又認為，呢種計算方式有盲點，只純粹考慮息口而忽略咗量，如果計埋量，估值其實唔應該咁高。

KC續指，銀行股係反映經濟表現，而摩通股價喺市況唔算太差之下，一直跑輸大市，佢認為明年要跑出有難度，建議投資者採取觀望態度。