【名家給力場】去槓桿引爆美股今輪跌浪

【Now財經台】美股昨晚(20日)又冧，仲要單日轉向，如果睇返納指100已自高位回落近5%，值得留意係，今次支大陰燭同10月10日嗰次跌市有啲相似，都係當日跌完又升過，點睇今輪跌浪，會唔會依家先係冧市嘅開始？

冠域商業及經濟研究中心主任關焯照指，10月10日業績期仲未開始，所以啲人都唔敢沽落去，翌日就彈返上去，開始冚倉夾返上去兼破頂，但今次就有少少特別，因為英偉達(Nvidia)都出咗業績，加上大市喺高位行咗咁耐，一般都會借業績好消息出貨。

關博士續指，依家估值過高之餘，又擔心人工智能(AI)泡沫，標指市盈率(PE)高過10年平均，所以就借勢調整，而AI概念股更被「腰斬」，跟住就輪到「科技7雄」(Magnificent 7)，但蘋果公司(Apple Inc.)跌得唔多，因為佢冇AI。佢又話，今輪跌市主要受去槓桿等3個因素影響。