【FINTERVIEW】甲骨文雲計算生意唔賺錢拖冧價？(下)

【Now財經台】據《The Information》報道，美國科技巨企甲骨文(Oracle)嘅雲計算業務利潤率只有14%，遠低過集團整體約70%嘅毛利率，亦低過華爾街嘅估算，拖累Oracle股價昨晚(7日)一度急瀉7%，收市就跌逾2%，更震散埋其他雲計算概念股，點睇Oracle嘅情況？

星漢資產管理行政總裁王榮昆指，Oracle係較易攻擊嘅對象，原因係微軟(Microsoft)、Meta、Google等公司嘅負債比率，只係介乎約27%至50%，但Oracle就接近80%，相比之下，Oracle負債比率太高，喺呢個情況下，公司嘅雲端資本支出(capex)非常大，就會引發市場憂慮，所以昨日消息一出，股價就一度急瀉。

James續指，Oracle 8月出租英偉達(Nvidia)晶片業務蝕咗約1億美元，原因係喺砌好數據中心到交畀客戶使用，期間有一個時間差，但集團又冇提及箇中原因，相信呢個都係市場比較擔心嘅地方。