【股市脈搏】半新股博雷頓勝在街貨多？

【Now財經台】有新能源概念嘅半新股博雷頓(01333)，股價今日(26日)裂口高開逾14%後，買盤不斷湧入，升幅一度擴大至逾44%，升勢亦有成交配合，暫時成交金額突破逾6億元，成交股數較過去100日同時段平均大增42倍。

集團昨晚(25日)宣布跟新疆鳴陽礦業訂立戰略合作協議，鳴陽礦業將向公司購買不少於1000台電動礦卡無人駕駛車輛及無人駕駛服務，股價今日異動或同呢個消息有關。

股價方面，博雷頓上市僅逾4個月，較難評估技術走勢，股價暫時喺50至60元有阻力，但現價較上市價18元，高逾1.5倍，睇返上市文件，扣除基石投資者獲發約350萬股後，依家街貨約950萬股，為股價帶來上升條件，但要留意股份喺上市9個月後，禁售期將會喺明年2月7日先屆滿，較一般新股6個月禁售期限長。