【股市脈搏】義合控股購AI公司股價可推到破頂？

【Now財經台】義合控股(01662)今日(17日)復牌，高開逾10%，開市報2.99元，好快已升穿3元關口，高見3.01元，大升逾11%，其後曾短暫倒跌，之後再發力向上，暫時成交金額逾2000萬元，成交股數較過去100日同時段平均大增12倍。

近期同人工智能(AI)相關嘅中資股特別強勢，義合亦沾上AI概念，公司昨晚(16日)公布折讓配股集資逾3500萬元，其中1500萬元會用嚟收購提供AI基礎設施嘅服務公司Trio AI Limited近52%股權。

Trio專門提供香港地區GPU，加速雲端運算解決方案提供AI模型開發、訓練等，通告又提及，今次投資係希望透過AI及高性能運算(HPC)，優化集團地基及土木工程項目規劃等，更有望為集團開拓新收入來源。

義合股價暫時未能企穩3元水平嘅逾4年高位，要留意喺AI熱潮下，股價有冇機會挑戰上市高位，即3.5元。