【股市脈搏】福森藥業癲升後仍未「上水」

【Now財經台】福森藥業(01652)股價今日(16日)高開逾14%，見咗暫時低位，之後買盤不斷湧入，升幅一度擴大至逾4倍，高見1.75元，升上逾2年半高位，暫時成交金額近3000萬元，成交股數較過去100日同時段平均飆298倍。

睇返公司最新中期業績，雖然2大主打產品中標第3批全國中成藥帶量採購，又指中標價理想，但期內收入仍按年跌33%及70%，拖累整體收入按年跌43%，虧損則逾2300萬人仔。集團旗下治療糖尿病藥片獲批喺內地上市，可唔可以救到業績仍要觀察。

股價方面，福森基本上冇技術走勢可言，升上高位後即有獲利盤，依家出現1條短短嘅上影線，雖然股價爆升，但仍然係「潛水」，以今日暫時即市高位計，同當日上市價2.08元比較，仍低逾15%。