【萬寧惠康母企】傳DFI零售集團Cut香港員工

【now.com財經】本港失業率昨日(19日)已經出爐，最新升至3.7%，市場原本預期可以企穩3.5%。金融學者李兆波指出，由於零售及餐飲市道持續疲弱，估計失業率今年好大機會升至4%。相隔唔夠1日，市傳有大型零售集團計劃裁減香港員工。

有本地傳媒報道，喺香港經營萬寧、惠康、7-Eleven，怡和集團旗下零售旗艦，喺新加坡上市嘅DFI零售集團，公司行政總裁Scott Price喺內部電郵表示，集團可能透過裁員、外判職位等方式簡化營運，原因係過去5年支援職能嘅成本大增，推高產品成本，最終要消費者面對價格上升，佢認為呢個情況唔可以持續落去。

不過，報道冇提及DFI呢個計劃最終會有幾多香港員工受影響。

雖然DFI話受經營環境影響要考慮Cut人，但集團股價今年表現其實唔差，股價整體趨勢向上，今年以來累升逾50%。