【息賺】HIBOR再升買REITs好過地產股？

【Now財經台】本港銀行同業拆息(HIBOR)今日(18日)繼續向上，本港銀行體系結餘回落至5月資金流入前起步點，降至537億元，隔夜拆息連續兩日顯著回升，跟H按相關嘅1個月拆息升穿2厘，地產股應聲下挫，上周銀行公會署理主席陳銘僑指，如果結餘繼續收縮，預期HIBOR將慢慢貼近美息，如果結餘跌穿500億元，HIBOR可能會急升，呼籲市民投資要「計清楚數」，雖然近日HIBOR回升，但仍未重上年初高位，對息口敏感嘅房地產股及收租股，如果拆息進一步回升，港元定存會跟隨回升，房地產股到底值唔值博？

獨立市場策略師何啟聰指，如果拆息進一步回升，估計地產股會受較大壓力，因為HIBOR直接影響供樓、樓價等，關乎市場對樓價後市嘅睇法，但地產股及房地產信託基金(REITs)受HIBOR影響嘅程度唔同，唔少REITs嘅租務、收租情況都相對穩定，對比房地產股嘅風險就更加低，同其他收息股相比，REITs嘅回報亦唔錯，因此更值博。