【名家給力場】美國「關稅武器化」長遠弊多於利？

【Now財經台】今日(1日)係美國對等關稅(Reciprocal Tariff)「大限」嘅大日子，美國總統特朗普(Donald Trump)已簽咗行政命令，向69個貿易伙伴徵收10%至41%關稅，將會喺7日後生效，不過，加拿大關稅就加到35%，到底仲有冇得傾？對市場氣氛有咩影響？

冠域商業及經濟研究中心主任關焯照指，大部分國家嘅關稅已經落實，一啲未傾掂數嘅國家就被徵收較高關稅，當中有「懲罰」意味，由於加拿大政府嘅代表態度強硬，所以最終關稅稅率仍然係未知之數，但特朗普都要考慮通脹壓力問題，所以最終稅率有機會係25%或以下。

關博士又指，整體稅收水平明顯較以往高，亦符合特朗普政府希望改善財赤嘅目標，雖然政策短期有助改善財政狀況，但長遠有機會影響同盟友嘅關係，貿易政策變咗戰略工具，令其他國家對美國戒心更大，或會減少跟美國嘅貿易比重。