【環球金融快線】追入Meta要等等

【Now財經台】美國科技巨頭Meta第2季收入達475億美元，按年增長22%，純利逾183億美元，按年增長36%，遠超市場預期，股價昨晚(7月31日)一度破頂，高見784.75美元。有逾40家分析機構叫買Meta，目標價最牛睇930美元。依家係咪好時機追入Meta？

Solomons Group 亞太區投資及ESG總監黃耀宗指，8、9月金融市場通常會比較波動，今年美股累計升幅唔少，投資者要留意大市回調風險，即使公司業績表現好，想追入嘅投資者可能要考慮將倉位減半。

佢又話，Meta業績亮麗，人工智能(AI)相關概念令廣告收入增長強勁，公司再調升指引，有利股價表現。Andy認為未來要留意TikTok對Meta廣告收入及市佔率嘅影響，不過睇好中線股價走勢，雖然依家估值稍貴，當大市出現調整，可以考慮趁低吸納Meta。