【公司專訪】GUM:港股及亞股睇高一線因為...(下)

【Now財經台】今年上半年強積金(MPF)整體回報唔錯，當中以股票基金表現最突出，其中一大動力係來自港股，恒生指數上半年累升約20%，跑贏其他主要市場，點睇上半年MPF回報？打工仔嘅MPF投資配置又係點？

GUM常務董事陳銳隆指，MPF資產配置中，股票佔比達67%，所以股市表現對MPF回報有好大影響，最近對等關稅(Reciprocal Tariffs)問題緩和，各地股市表現都好轉，市場認為，關稅問題冇想象中咁差，雖然美國總統特朗普(Donald Trump)可能會繼續「TACO交易」，但關稅政策已逐漸明朗，加上市場預期美國下半年會減息，所以普遍保持樂觀情緒，GUM強積金綜合指數年初至今升10%，相信都係一個好消息。

Michael又話，股市方面，較睇好港股及亞洲區股市，因為歐美股市或較受關稅影響，投資氣氛冇亞洲區咁好。佢補充，今年1月至5月已有逾260億元資金流動，全年估計有逾600億元資金流動，相信規模會再一次創新高，但見到1月至5月，資金主要流入保守基金而非港股，投資者將高風險股票基金轉向低風險產品，可見市場一旦出現波動，投資者嘅避險情緒會即時升溫。