【FINTERVIEW】亂局下將美股換馬至亞歐股市？(上)

【Now財經台】美股近日因美國總統特朗普(Donald Trump)不停炮轟聯儲局主席鮑威爾(Jerome Powell)，甚至揚言可以炒咗佢而大跌。不過，特朗普昨晚(22日)話無意炒鮑威爾，又稱有機會大幅下調對華關稅，憧憬局勢降溫，美股3大指數昨晚大幅反彈，其中，道指升逾千點，喺依家呢個亂局下，投資者應該點應對？

滙豐環球私人銀行及財富管理亞洲區首席投資總監范卓雲指，投資者可以考慮做短期戰略部署，中長期部署就要視乎結構性趨勢而定。佢認為，由於多國正喺90日對等關稅(Reciprocal Tariff)寬限期間進行貿易談判，加上特朗普及美國財長貝森特(Scott Bessent)提及會力爭跟中國進行貿易談判，希望可以下調現時對華徵收嘅145%關稅，呢兩個因素都會令避險情緒高漲，亦會主導市場。

范卓雲又話，雖然針對個別國家嘅關稅有90日寬限期，美國又暫時豁免中國智能手機及半導電子產品關稅，但現時美國已實施10%嘅最低關稅，對汽車、鋼鐵、鉻材實徵收25%關稅。由於中美仍搵緊降溫空間，令市場波動性較大，而當談判及關稅政策等不明朗因素增加時，市場就會出現較激烈負面反應，反之則會較正面。

佢建議，投資者喺依家嘅不明朗情況下，應採取防守性資產配置，同時必須分散投資風險，可以考慮將投資美股資金轉戰歐洲或亞太區股市。