【FINTERVIEW】港股當炒 VS 美股難玩

【Now財經台】今日(28日)係港股2月最後一個交易日，恒生指數今個月暫時累升近17%，除咗受惠於DeepSeek熱潮，亦同美國總統特朗普(Donald Trump)期間將焦點放喺加墨關稅，同埋其他地緣問題，未有太聚焦中國，有利港股表現。不過，特朗普昨晚(27日)突然宣布再加中國貨10%關稅，拖累港股今早(28日)一度瀉逾500點，呢啲消息會點影響港股後市？美股3大指數昨晚都要跌，係咪同樣受關稅政策拖累？

安柏環球金融集團首席投資總監雷志海指，恒指之前升咗咁多，今日回套都係合理，其實關稅問題唔係新鮮事，市場喺特朗普上任後已經預咗，所以對港股嘅影響唔係太大。佢又話，港股今個月嘅升勢，反而同DeepSeek有關，因為DeepSeek引發市場更大想像空間，令外國投資者重新審視A股及港股嘅潛力和機會，所以都見到有資金回流港股。

美股方面，John坦言後市會好難玩，當地投資者睇得太樂觀，市場期望聯儲局會減息，但依家美國通脹再升溫，減息空間一定細咗，佢又提醒，依家美國10年期債息已低過3個月期債息，孳息曲線出現倒掛，已發出美股有機會回調嘅訊號。