【名家給力場】美科技股ETF半年冇升過有咩啟示？(下)

【Now財經台】債息喺減息周期中抽升，歷史上係非常罕見，美股3大指數昨晚(7日)反應負面，科技股顯著受壓，其中，英偉達(Nvidia)股價破頂後倒插。如果債息升唔停，邊類股票或資產會受最大影響？

「股市漁夫」創辦人莊志雄指，美債係長期資產嘅基準，尤其是優質股，例如科技股交易所買賣基金(ETF)XLK，債息升就會令長期資產估值受壓，債息扯得愈高，市場就會要求呢啲長期資產嘅估值下降。

佢續指，特朗普(Donald Trump)當選美國總統後，科技股ETF曾嘗試突破2024年7月高位，但去年12月嘗試突破失敗，就係因為聯邦公開市場委員會(FOMC)去年12月會議後，市場知道2025年會放慢減息步伐，XLK即失咗突破動力，已半年冇錄得升幅，投資者要留意，過去半年冇升幅究竟係整固還是係派貨，但正常整固係唔需要半年咁耐。

Lewis又話，企業高層亦冇買入自己公司嘅股份，知情人士交易亦係10年以嚟最少，若企業高層認為特朗普上任後，公司股價會升，理應喺現階段入貨，因此，佢建議散戶先減少槓桿，再小心留意股價未來嘅走向。