【FINTERVIEW】內地放寬出行利澳門經濟轉型

【Now財經台】有報道指，國家主席習近平將會喺下周五(20日)出席澳門回歸25周年慶典，到時澳門將實施一啲管制措施，呢個亦係賭收喺12月開局賭收減少嘅原因。睇返今年賭收仍未去返疫情前水平，展望明年，賭收走勢又會點？

中泰國際策略分析師顏招駿指，領導人訪澳唔會影響賭收，睇返過往，反而同賭場大客訪澳時間有關，不過，依家澳門博彩業主攻家庭客及高端中場客，所以關鍵在於佢哋有冇假期，佢相信，喺聖誕假期及內地放寬居民赴澳簽證下，旅客人流應會增加，暫時估計12月賭收會反彈至約195億澳門元，相當於2019年同期約83%。

顏招駿相信，明年賭收會延續今年嘅走勢，雖然貴賓廳(VIP)仲未恢復，但利潤率較高嘅中場已重返疫情前水平，預期明年賭收可達2400億澳門元。

Alvin又認為，澳門明年政策大方向已定，將繼續致力發展旅遊業，希望博彩業佔本地生產總值(GDP)嘅佔比維持40%以下，以減少對博彩業嘅依賴，而唔同嘅基建發展及內地放寬出行都有利澳門經濟轉型。