【輪證贏家】噚日隻恒指牛食倍真係意外嚟架

【now.com財經】噚日揀咗隻恒指牛(62971)出嚟，平均買入價為0.0435元，但由於落場後見指數喺五分鐘圖上被條中軸擋路，喺呢度慣常用小時圖做Trade嘅話，借到最盡用小時圖嘅中軸線好啦。

午後指數返嚟真係有踩多次條中軸線守得住指數，本以為指數都可能咬住197sth而完場，估唔到3點半打後，一條新聞出爐之後將指數由197sth向上抵打到4點，係呀，Day High係喺收市前出現，高見20,433點。

基於爆升之後五分鐘圖未見好倉走貨訊號，如常喺呢度以唔過夜DT計，(62971)喺完場前如常用返10分鐘時間散場計數，按期內(62971)高低位做過0.109元/0.101元，平均走貨價為0.105元。坦白講都係第一次「翻倍」，呢一注勁食61.5格或141.38%。

我想提早放聖誕呀~

今朝恒指再抽升多655點開市，不過今日再睇熊證街貨層其實街貨量唔多，指數借開市裂口向上走，以一下子食完六層街貨之後，呢個裂口應該會先引來唔少過夜牛仆出嚟先行獲利，咁嘅話指數就會受壓，咁高開低走嘅情況就會出現。

結果指數甫開市向下低走，低走咗大約半個鐘頭左右，落返去205/206水平先識得停，戰友過夜好倉同即市淡倉全清之後，望下個鐘都已經10點10分，喺五分鐘圖上見指數已經借咗條10線慢慢爬返上去，同時五分鐘圖整條保歷加通道都轉返向上，Swing Trade比返出嚟。

如果到你睇完文之後再睇返個走勢圖，見到條恒指都仲係借住保歷加頂線同10線行Swing的話。

借到10線企好上嘅，恒指牛(62999)，收回價19742點，同現價有約848點距離但已經係今日最貼嘅牛嚟架啦，槓桿有約21.4倍。

相反，如果睇文時見到10線已經無咗嘅，同樣放一隻同現價都係遠嘅恒指熊(54950)，收回價21,400點，有約772點距離，槓桿約27.1倍。

兩邊都揀遠貨係因為指數經過噚日大幅度抽高之後，啲點數比例唔同晒，去返9月尾、10月初咁，郁少少都講緊一二百點，呢啲波幅咁大嘅市，揀遠啲安全啲。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar