【環球金融快線】「特朗普2.0」時代財策前瞻

【Now財經台】現任對沖基金Key Square Group行政總裁貝森特(Scott Bessent)，獲候任美國總統特朗普(Donald Trump)提名做下屆財長，貝森特支持減稅，包括個人及企業。關稅政策方面，雖然佢贊同特朗普嘅美國優先政策，但佢都曾經話過要兼顧美國通脹問題，點評估「特朗普2.0」時代嘅美國財政政策？

獨立市場策略師陳俊文認為，貝森特明顯係屬於溫和派，相信喺減少財政赤字方面會較為保守，例如透過慳錢減少財赤，呢個做法會利好通脹前景及美債孳息率，當財赤唔係咁龐大時，可透過平衡債券供求令債息低企。

Norman又指，雖然貝森特喺關稅問題上認同美國優先，但認為要循序漸進先可以令通脹壓力較細，所以見到10年及30年期國債孳息率都向下降，當關稅進一步落實後，相信會有再下跌空間，令美元進一步向下。