【FINTERVIEW】非農數據唔會左右美息走向？

【Now財經台】美國上月職位空缺係逾3年半以來最少，期內，企業裁員人數增至2023年1月以來最多，市場估計，聯儲局下周好大機會減息0.25厘。美國好快就會公布非農就業數據，係聯儲局下周議息前最後一個重磅就業數據，會點樣影響息口走向？

華僑銀行利率策略師張淑嫻指，雖然之前有唔少跡象顯示美國就業市場降溫，但未至於會有衰退風險，相信數據對勞動市場影響唔大，若就業市場持續放緩，聯儲局仍有減息空間，即使投資者對減息預期降溫，但仍有信心之後會繼續減息。

佢又話，依家美國國內生產總值(GDP)有啲滯後，但本身底子唔太弱，依家經濟仍處於理想狀況，而美國10年期債息向上，主要係臨近美國總統大選，並非由經濟基本面主導，即使非農數據有驚喜，但市場最終反應仍有高度不確定性。