【名家給力場】市場今次偷步炒「Trump Trade」(上)

【Now財經台】美國總統大選下個月就舉行，據博彩公司賠率顯示，特朗普(Donald Trump)暫時勝算較大，市場都攞特朗普2016年勝選嗰次作為炒作參考，各類資產價格走勢都好相似，「Trump Trade」效應係咪繼續有得炒？

「股市漁夫」創辦人莊志雄指，睇返博彩市場，特朗普10月之後勝算增加咗，接近63%，但呢個只可以反映特定某個族群嘅取態，炒美股要睇闊啲，睇返各類資產價格表現，特朗普2016年第1次參選時，各類資產係喺佢當選後先有反應，今次市場算係偷步炒，因為特朗普勝算高啲，大部分資產價格走勢同2016一樣，地區性銀行指數跑贏標普500，30年期美國債跌5%，只係金價同當年走勢唔同，今次係有得升。

Lewis又話，睇埋羅素2000指數，長倉倉位已升至阻力位，亦抽升過兩次，如果想繼續部署受惠於減息嘅中小型股，就要小心聯儲局未來嘅減息幅度，係咪仲有咁大減息空間，因為依家仍處於淺度減息周期，但市場就炒緊未來會減更多，踏入深度減息周期，不過，唔排除美國經濟狀況會再惡化，投資者必須小心部署。