【FINTERVIEW】炒港股注意！現價買貨仲有水位？(上)

【Now財經台】中央之前推出多項重磅救市措施後，市場估計，國慶長假後會繼續出招，救市「組合拳」令A股及港股牛氣沖天，其中，港股近期急升後，正處於大漲小回格局，若內地長假後再有救市措施出台，港股投資者該點樣部署？

渣打北亞區投資總監鄭子豐指，恒指仍然係一個震盪向上格局，喺22700點有阻力，原因係預期中央會未來數周會有更具體嘅財政政策出台，有望符合市場約2萬億人仔嘅預期，有望帶動恒指上到22500至24500點區間，現階段入市仍有上升空間。不過，依家港股市盈率(PE)約10.5倍，同歷史平均水平相若，所以希望更多財政措施出台，能令市場憧憬企業盈利有更大上升空間。

Raymond又認為，中央推出嘅措施須針對內地經濟短板，例如內房、股市及失業率高企等，尤其內房方面，雖然已有唔少省份，甚至一線城市陸續放寬樓市措施刺激需求，但事實未能完全解決內房問題，佢估計，中央需動用5萬億至10萬億人仔嘅財政措施支持樓市，希望會推出更多全國性刺激樓市嘅措施，例如中央發債直接購買過剩房屋。