【FINTERVIEW】鮑威爾大手減息做超前部署(下)

【Now財經台】美國聯儲局一如預期減息，但今次減幅達0.5厘，聯邦基金利率目標區間降至4.75厘至5厘，聯儲局主席鮑威爾(Jerome Powell)表示，目的係要穩定就業市場，其實以美國依家嘅經濟狀況，有冇需要大手減息？今次減0.5厘係咪想做超前部署？

摩根資產管理環球市場策略師周奐彤認為，睇返之前嘅加息周期，已經見到鮑威爾偏好做超前部署，今次減息都係屬於一個超前部署。睇返美國整體經濟，鮑威爾之前喺Jackson Hole全球央行年會指，會將焦點放喺就業市場，加上美國通脹正逐步回落至2%嘅目標水平，局方下調個人消費開支(PCE)預測，並上調失業率預測，所以今次減息幅度比預期大，會令市場揣測或質疑能唔能夠藉此保護經濟。

Marcella又指，最新「點陣圖」預視聯儲局年底前會再減息0.5厘，2025年則減息4次，每次0.25厘，相比6月，「點陣圖」嘅變化比經濟預測變化更大，市場需留意「點陣圖」及經濟預測嘅可信性及波動程度。