【槓桿致勝】恒指牛熊證收回價宜擺遠啲

【Now財經台】恒生指數已連升第4個交易日，好倉轉為流入，昨日(12日)流入逾270萬元，不過，5日合計有逾1億元資金離場，淡倉就連續4日有資金流入，昨日流入逾500萬元，5日合計有逾1.25億元資金坐貨。

此外，牛證重貨區大幅上移至16700點，熊證重貨區就繼續喺17400點。昨日好淡倉都有資金流入，似乎反映後市仍然未有明確方向，恒指今朝(13日)走勢反覆，做部署時有咩要留意？

中薇證券研究部執行董事黃偉豪指，港股近期都係一個窄幅拉鋸格局，昨日成交亦好少，僅約700億元，短線有機會繼續拉鋸，又或者突然爆邊，外圍波動性亦較大，佢認為後市突然爆邊機會較大，做好淡倉部署時，宜同現價有一段距離比較好，尤其做過夜部署。

佢又話，如果睇淡後市，收回價宜距離現價逾800點，例如18000點以上，若做好倉部署，收回價宜擺16100點水平。