【股市脈搏】台積電一個累全家

【Now財經台】亞股今日(5日)又冧，其中，台股以接近全日低位收市，瀉1807點，成交較上周五(2日)大增22%，其中，外資淨沽出近700億新台幣。台灣證交所喺收市後舉行記者會，強調台股基本面仍然強勁，必要時會採取穩定市場措施，但指現階段未有出手必要。

台積電係今日台股跌市元兇，台灣加權指數今日跌幅中，有約40%跌幅受台積電拖累，集團股價今日亦錄得上市以嚟最大跌幅，收市重挫9.7%，報815元新台幣。

睇返技術走勢，早前台積電股價已開始調整，跌返去升浪嘅黃金比例0.382水平，今日跌穿買升浪嘅0.5水平，意味升幅蒸發逾一半，而且14天相對強弱指數(RSI)已見30嘅超賣水平，後市係咪可以反彈，要留意住日圓幾時回穩及拆倉潮幾時完。