【FINTERVIEW】林俊泓:料美國今年減兩次息

【Now財經台】美國聯儲局維持利率不變，但主席鮑威爾(Jerome Powell)會後表示，或最快9月開始減息。上商銀行研究部主管林俊泓預期，聯儲局今年會分別喺9月及12月減息兩次，而11月好大機會暫緩減息，因為當月議息會議適逢當地總統大選完結後一兩日，估計聯儲局唔希望被外界認為減息決定係受政治因素影響。

林俊泓預期，今次減息周期將持續兩年，但前期步伐會明顯較後期快，盡快令息口回落至接近均衡利率(equilibrium interest rate)水平，以便日後就有更大彈性調整利率。

林俊泓又認為，聯儲局對最終利率嘅預測過分保守，並引述當局公布嘅6月點陣圖，大部分委員認為利率最終會落喺2.75至3厘水平。然而，近年全球經濟已出現結構性轉變，好多國家嘅製造業開始回歸本土(reshoring)，或者遷至鄰近友好地區，好難捉摸到全球通脹走勢，相信利率最終會喺約3.5厘嘅較高水平橫行。