【FINTERVIEW】工黨難即時令英國經濟起死回生

【Now財經台】工黨喺今次英國大選大勝已成定局，工黨其中一項政綱係設立嚴控政府支出規例，並會徵收唔同稅項，長遠希望可以提振當地經濟，到底工黨上場後對英國前景有冇正面幫助？

花旗投資策略及財富策劃部主管廖嘉豪指，現時英國經濟除面對需求不足外，亦要面對高利率問題，呢啲唔係一時三刻可以解決，即使施紀賢最終成為英國首相，亦唔可能喺短時間內解決經濟問題，所以當地經濟仍會持續面對較大壓力。

佢又話，英國股市、債市及英鎊匯價喺選舉前都做得唔錯，英鎊強勢，債價又升，英國股市甚至跑贏歐洲股市，經濟情況同投資市場形成強烈對比，雖然市場對工黨嘅財政政策持正面態度，但係咪真係可以為英國經濟帶來新衝擊，長遠仍要觀望。