【專家分析】Yen失守160！日央行繼續打嘴炮？

【Now財經台】日圓160關終於頂唔住，跌至38年低位，日本財務省副大臣神田真人表示，對日圓急挫「嚴重關切」，並指日圓近期走勢「快速」及「一面倒」，神田今次語氣似乎比之前緊張，日本政府係咪好快會出手干預？

東亞銀行財富管理部首席投資策略師李振豪指，日本央行好大機會出手，但最大問題係當地貨幣政策仍然好含糊，市場認為應該加息時，日央行又唔加。佢又話，日本上月通脹回升，但國內生產總值(GDP)仍然係負數，有滯脹風險，依家日央行陷入一個兩難局面，雖然加息可以遏通脹，但亦會影響GDP。

李振豪續指，日本嘅情況比較被動，因為要等美國聯儲局減息，日央行加息嘅效用先會大，但美國不斷推遲減息時間，日本係咪可以撐到9月？有冇足夠資金出手干預？呢啲都係最值得擔心嘅問題，依家唔止日圓，日本債券及股市都有明顯震盪風險，鍾情日本資產嘅投資者要小心波幅性加劇。