【專家分析】若日央行縮表玩日股要睇路

【Now財經台】日本央行(BOJ)議息結果明日(14日)出爐，市場估計，日央行會維持利率不變，但會考慮逐步削減買債規模，係咪釋出趨向緊縮嘅訊號？對日圓走勢有咩影響？

東亞銀行財富管理部首席投資策略師李振豪指，息口按兵不動都預咗，反而要留意係咪會做「日式縮表」，即所謂嘅三步曲，停止買債、減少控制Yield Curve(孳息曲線)、調整利率，不論美國還是日本都係咁做，日本3月已取消負利率政策，相信好快會宣布縮表，規模其實唔重要，最重要係啟動咗呢件事，始終日本係量寬鼻祖，喺上世紀90年代已經開始做量寬，要消滅咁多債券係冇可能，但肯去做已經係30年以嚟嘅突破。

佢又提醒，10年期日本債息升穿1厘好少人談論，如果美日息差收窄，日圓就會回升，朝著150，甚至140方向走，喺呢個情況下，日股投資者就要小心，以往靠日圓跌而上升嘅日股，若日央行宣布縮表或預期會加息，日圓就唔應該咁弱。